Isee inıd yuşan ha`uyn:
"Sa adamiyqa q`öyre dixniy vor. K`ınni duxee dekkik`le eyhen:
– Dek yiğın var-dövlət, ğu yişdi aree bit`al he`e, zalqa gexhan qale.
Dekkee var-dövlət bit`al ha`an dixbişdı aree.
Sabara yiğbişile k`ınni duxee, cus huvuyn dekkee var-dövlət massa huvu, ayk`anna əqənani ölkeeqa.
Ark`ınni cigeeyid ağzunna ı`mır vukku, gırgın kar ak`an ha`an.
Mani vaxtal hamani ölkee giyğalanbı it`umun mıssın vaxtbı, mang`unid ı`mıre giyğalanbı dağamın yiğbı. Manke mana hayk`anna mani cigaynbişdi sang`usqa iş hivqas. Mang`vee mana g`ixelena cuni çolbişeqa vokkar uxhiyxhan ha`as. Dix həməxürniy mıs qıxha vorna, vokkaaşee otxhanan kar huvuynxhiy geerniy şad ixhes, mang`us hiççud heli ıxha deş.
Mana culqa qarı eyhen:
– Yizdi dekkiqa geeb işçer vob, manbişdi gırgıng`vee gıney otxhan, hale hexxadad axvan, zımee inyaa`ar mıssınçe qek`a. Dekkısqa sark`ıl eyhesın: "Dek zı yiğniyiy Allahni ögee bınahna iş hav`u. Zı yiğna dix ixhes layiq`ra deş vorna. İcaza hivle yiğni işçeşina sa ixhes."
Mana ayk`anna dekkisqa. Dekkik`le mana əq`ənançecar quvats`ı rəhı`m qavayli.
Dek mang`uni ögilqa g`adayxhvan qarı, xhılibişeqa sa`u, ubba ha`a.
Duxee eyhen:
– Dek, zı yiğniyiy, Allahni ögee bınahna iş hav`u. Zı yiğna dix ixhes layiq`ra deş vorna.
Dekkee cuni nukaraaşik`le eyhen:
– Zaraba, nekki yugun alya`an karbı alle, mang`ulqa ale`e, t`ubelqana tucvayiy, g`elilqan g`elilinbı hile. Qavale kokav`una dana, gyuvk`e. Qudora otxhun-ulyodğuybı ha`as. Ho`o dişde, yizda dix qik`uniy vor, üç`ür qıxha, agunaniy, avaykına.Manbı giviyğalanbı otxhan-ulyoğa.
Mani vaxtal xərna dix çoleeniy vor. Mana xaasqana qıxhamee, g`iyxhenbı mə`niybıyiy huvaagan sesbı.Mang`vee nukaraaşina sa qort`ul qidghın ha`uyn:
– Hicone haynyaa eyxhe?
Nukaree eyhen:
– Yiğna çoc sak`ı, dekkeeyib mana sağra-salamatra sak`ıva kokav`una dana givk`u.Xərna dix it`umra qəllamışxha, xaaqa ikkeç`es ıkkıykan deş.
Manke dek qığeç`u mana mizel aqqaqqa giyğal.
Xərni duxee dekkik`le eyhen:
– Haynimeni senbına zı vas nukar xhinne işlemiş ıxha, hammaşed ğu uvhuyn ha`u. Hambazaaşika otxhun-ulyoğas, ğu zas mısacab çepiçıb huvu deş. Yiğın var-dövlət otxhunni, pozğunni yedaaşika iykırni duxays, ğumee, sak`ı qarıng`a kokav`una dana givk`u.
Dekkee mang`uk`le eyhen:
– Dix, ğu hammaşe zaka vor, in gırgın zaqa vodunmen kar yiğın vodun. Həşdile şadepxhes, otxhun-ulyoğas ıkkan: yiğna çoc qik`uniy vor, üç`ür qıxha, agunaniy, avaykına."
